فجر الإعلامي أحمد شوبير، مفاجأة مدوية بشأن عدم حضور محمد مجدي “أفشة”، صانع ألعاب الفريق الأول لكرة القدم بالنادي الأهلي، حفل تدشين مشروع نادي القرن.
وأثارت تصريحات «أفشة»، صانع ألعاب، جدلًا واسعًا في الساعات الماضية، بعد ظهوره ببرنامج «الكورة مع فايق، في الساعات الأولى من صباح الإثنين الذي يقدمه الإعلامي إبراهيم فايق، عبر فضائية»إم بي سي مصر 2«.
سر غياب أفشة عن حفل تدشين نادي القرن
وقال أحمد شوبير، خلال برنامج “ملعب أون تايم”، المذاع عبر فضائية “أون تايم سبورتس”: “النهاردة في حفل الأهلي الكل مشافش أفشة، وكمان أفشة، منزلش التمرين النهاردة”، مضيفًا: “استبعاد اللاعب من التمرين هو حق للسويسري مارسيل كولر، المدير الفني للأهلي”.
وأضاف: “عدم حضور أفشة، الحفلة، أتمنى يكون أفشة، إللي مراحش مش النادي اللي معزوموش، وأنا اعتقد إن أفشة، إللي مراحش لأنه متضايق وده طبيعي جدًا”.
الأهلي يغرم أفشة
وتابع: “هناك عقوبة مالية وقعت على أفشة، من قبل خالد بيبو على خلفية تصريحاته الأخيرة، وعندي معلومة قريبة من الصح إن أفشة، سيشارك في مران الأهلي غدًا”.
وتسائل: “لحد إمتى هيستمر حرمان أفشة، من التمرين يوم اتنين تلاتة أسبوع؟ قول مفيش مشاكل، لو حضرتك عاوز إعتذار، أفشة معندوش مشاكل ممكن يعتذر من الصبح”.
وأضاف: “أفشة جانبه التوفيق، واللي معصبه أوي أنه لم ينضم للمنتخب خاصة إن حسام حسن، (المدير الفني للمنتخب)، مقتنع بيه جدًا، هو كان يتمنى التواجد في المنتخب، ولكن عدم لعبه لفترات طويلة تسبب في استبعاده من المنتخب”.
وكشف شوبير، مفاجأة قائلاً: “أفشة، كان حريص جدًا وقاتل حتى يظهر وحتى يتكلم وحتى يتحدث، وسعى بكل الطرق للظهور، أنا بقول معلومة”، مضيفًا: “أفشة، جانبه الصواب والتوفيق في تصريحاته، ودي بتحصل عادي”
وواصل: “أنا أتضايق أوي لما يتقال أفشة، معروض للبيع، ليه؟ هو غلط ولكن مقتلش قتيل يعني، وبعدين هو مقالش مباشرة فلان وفلان هو (لقح)، ومكانش يجب يعمل كدة”.
غضب لاعبي الأهلي من أفشة
وتابع “معظم لعيبة الأهلي زعلت واتضايقت من تصريحات أفشة، لأنها جاءت وسط الفرح وقال تصريحات مالهاش لازمة”.
واستطرد: “أجمل حاجة في النادي الأهلي أنه عنده لوائح ومبادئ وقواعد وعنده انضباط، أنا موافق على كل ده ، ولكن أنا ضد أحكام الإعدام، مينفعش اسمع أنه هيتم عرض أفشة، للبيع وتجميده”.
وأردف: “اللي عمله أفشة، يستحق عليه غرامة مالية كبيرة ماشي، عاوز توقفه ماتش واتنين ماشي، لكن في النهاية هو لازم ينزل تمرين ويبقى متواجد مع الفرقة ده طبيعي جدًا”، مضيفًا: “اللعيبة بتتمرن وهو يدخل الجيم بتبقى قاسية جدًا على اللاعب”
وأتم: “كولر من حقه يزعل وياخد كل إجراءاته، ولكن مش عاوز اسمع كلمة أفشة، مجمد ومش عاوز اسمع كلمة معروض للبيع، أفشة له تاريخ عظيم مع الأهلي يعني لو تاريخه كله يقف على هدفه في الزمالك في مباراة القاضية ممكن ده يغفرله”.
